Бүгін «Анаға тағзым» орталығында Әкелер күніне арналған «МЕН СЕНІҢ ӨМІРІҢНІҢ ЖАЛҒАСЫМЫН...» атты OPEN TALKS форматында кездесу өтті. Шарада ең алдымен, әкеге деген сағыныш, әке қадірін ұғындырып, көпшіліктің көзіне жас үйірген «Болмаған балалық шақ» спектаклінен үзінді сахналанды.

Мұнан соң, «Әкелер одағы» республикалық қоғамдық бірлестігінің төрағасы Мақсұтбек Дүйсенұлы, профессор Баймырза Қожамберлиев, Дін мәселелерін зерттеу орталығының аға маманы, теолог Бақтияр Оспанов, облыстық мәслихат депутаты, «Әкелер одағы» РҚБ Қызылорда облысы филиалының төрағасы Ержан Искендер және Облыстық ҚХА жанындағы Аналар кеңесінің төрағасы, қалалық мәслихат депутаты Айгүл Мұсабаева тағылымды әңгімелерімен бөлісті. Ер адамның қоғамдағы рөлі, отағасының отбасындағы орны, бала тәрбиесіндегі мән-маңызына кеңірек тоқталды. Сондай-ақ, айтыскер, ақын, жырау Айдос Рахметов талантты ұлы Нөсер Рахметовпен бірге «Жыр бастауы» термесін орындап, әке мен ұлдың жарасымды үлгісін көрсетті.

Еркін форматтағы жиын соңында көрермендер ақын, жазушы Мұхтар Шахановтың сөзіне жазылған композитор Нұрғиса Тілендиевтің «Әке туралы жыр» әнін бірге орындап, мерекелік бағдарламаны әдемі нотада түйіндеді.