Бүгін орталық базасында «Гүлдей нәзік, болаттай берік» облыстық жұмысшы арулар фестивалін қорытындылауға арналған мерекелік жиын өтті. «1 наурыз – Алғыс айту күні» және «8 наурыз – Халықаралық әйелдер мерекесі» қарсаңында ұйымдастырылған шарада әр ауданнан арнайы келген жұмысшы арулар, алдымен, «Анаға тағзым» ескерткішіне гүл шоқтарын қойып, клуб-студиялардағы шеберлік сағаттарына қатысты. 

Салтанатты жиында облыстық мәдениет, архивтер және құжаттама басқармасының басшысы Мира Қазбекова сөз сөйлеп, жұмысшы аруларға облыс әкімінің орынбасары Ш.Баймановтың алғыс хатын табыстады. Кәсіпқойлығы мен шығармашылығын шебер ұштастырып, аудандық кезеңде ерекше көзге түскен 12 қатысушыға фестивальда «Еңбегімен көрікті», «Құрыш білек», «Адал табыс», «Кәсіби шебер» секілді арнайы номинациялар берілді. 

Облыс әкімі жанындағы әйелдер істері және отбасылық-демографиялық саясат жөніндегі комиссия, «Сыр елі облыстық әйелдер кеңесі» ҚБ және  «Анаға тағзым» орталығы бірлесе өткізген шарада жұмысшы арулар концерттік бағдарлама тамашалап, өздері де сахналанған қойылым көрсетті.

Жалпы, қарапайым еңбек адамдарының адал еңбегі мен жетістігін дәріптеп, өскелең ұрпаққа өнегелеу, олардың қоғамдағы рөлін насихаттауды мақсат тұтқан шара Шиелі ауданынан бастау алып, оған түрлі салада жемісті еңбек етіп жүрген 60-тан аса жұмысшы әйел қатысты. 

#ЖұмысшыМамандықтарЖылы
#ЕңбекАдамдары
#АдалЕңбек
#ӘйелдерҚанаты